വില്‍ക്കാനുള്ള ചിലത്

വൃദ്ധയായ ഒരമ്മയെ വില്‍ക്കാനുണ്ട്.
ചോറുപാത്രത്തില്‍ സ്നേഹം പൊതിഞ്ഞു തന്ന,
സ്നേഹത്തിനു സഹാനമെന്നോരര്‍ത്ഥം പഠിപ്പിച്ച,
പ്രായത്തിന്‍റെ ചെതുമ്പലുകള്‍ മൂടിയ ഒരമ്മ.
(സ്വപ്നങ്ങളുടെ ഒരു ശവക്കുഴി സ്വന്തമായുണ്ട്)

വയസ്സനായ ഒരച്ഛനെ വില്‍ക്കാനുണ്ട്.
യുദ്ധങ്ങള്‍ പൊരുതാനുള്ളതെന്നോതിയ,
ഇന്നലെകളില്‍ നിന്ന് ഇന്നും
ഇന്നില്‍ നിന്ന് നാളെയും എന്നോരറിവ് പകര്‍ന്ന,
വില്‍പത്രത്തില്‍ അവസാനത്തെ ഒപ്പും ചേര്‍ത്തോരച്ചന്‍.
(ഹൃദയത്തിനുള്ളില്‍ ഇന്നും അടച്ചുറപ്പുള്ള ഒരു വീടുണ്ട്)

പഴയൊരു ഭവനം വില്‍ക്കാനുണ്ട്.
ഓര്‍മ്മകളുടെ ഓടിളക്കങ്ങളുള്ള,
ബന്ധങ്ങളുടെ വിയര്‍പ്പുമണമുള്ള,
വര്‍ഷങ്ങളുടെ വിരലടയാളങ്ങള്‍
ശേഖരിച്ച ഒരു വീട്.
(ചില ചുമരുകള്‍ക്ക് നിറഞ്ഞ കണ്ണും മിടിക്കുന ഹൃദയവുമുണ്ട്)

ഇന്നലെകളിലെ ഒരു ഗ്രാമം വില്‍ക്കാനുണ്ട്.
ആദ്യചുംബനത്തില്‍ ലഹരി കത്തിയ
ഉത്സവപ്പറമ്പ് ഉണ്ടായിരുന്ന,
മണലില്‍ ആദ്യാക്ഷരം കുറിച്ചോരറിവുപുരയുടെ
അസ്ഥികൂടം ചുമക്കുന്ന,
തിരിച്ചെത്താത്തവരെ കാക്കുന്ന
കാല്‍പാടുകളുള്ള ഒരു ഗ്രാമം.
(ഗൃഹാതുരത തുളുമ്പുന്ന മദ്യപാനസദസ്സുകളില്‍ വീഞ്ഞ് നുകരാന്‍,
ഓര്‍മ്മകളുടെ അനേകം തലയോടുകളുണ്ട്‌)

ഇന്നിന്‍റെ ഒരു മനുഷ്യനെ വില്‍ക്കാനുണ്ട്.
ഓര്‍മ്മകളെ മറവികളാക്കിയ,
ചിന്തകള്‍ ഇന്‍റെര്‍നെറ്റില്‍ വില്‍ക്കുന്ന
ഒരു മനുഷ്യന്‍.
(സംഭരണിതന്‍ രൂപം കൈക്കൊള്ളും
ജലത്തിന് തുല്യമാമൊരു മനസ്സുണ്ട്)..