വീതം വയ്പ്പ്

തോമാച്ചന്റെ തര്‍ക്കസ്ഥലം മൂന്നായി വീതം വയ്ക്കുന്നു.
ഒന്ന് തോമാച്ചനും
ഒന്ന് അയലത്തെ കുഞ്ചുവിനും
ഒന്ന് പറമ്പില്‍ മേയുന്ന നാണിപ്പശുവിനും.
കാഷ്മീരിന്നു മൂന്നായി വീതം വയ്ക്കുന്നു.
ഒന്ന് ഇന്ത്യക്കും
ഒന്ന് പാക്കിസ്ഥാനും
ഒന്ന് കാശ്മീരികള്‍ക്കും.
കാവേരി നദി മൂന്നായി വീതം വയ്ക്കുന്നു.
ഒന്ന് കര്‍ണാടകത്തിനും
ഒന്ന് തമിഴ്നാടിനും
ഒന്ന് മണല്‍ മാഫിയയ്ക്കും.
മുല്ലപ്പെരിയാറും മൂന്നാക്കി.
ഡാമിലെ വെള്ളം തമിഴനും
ഡാം പൊട്ടിയാല്‍ വെള്ളം മലയാളിക്കും
അതിലൊഴുകും ശവങ്ങള്‍ അറബിക്കടലിനും.
എന്‍റെ ജീവിതവും മൂന്നാക്കുന്നു.
ജനിക്കാനും
ഒളിച്ചിരിക്കാനും
മരിക്കാനും.